جوزي طردني من بيتي علشان بنت خالته المطلقة… لكن المفاجأة اللي حضرتها لهم قلبت حياتهم! الجزء الثالث والأخير: سر الأيام السبعة والخيانة اللي جت من أقرب الناس — مستحيل! مستحيل يكون هو اللي عمل فيا كده! صرخت بالجملة وأنا ماسكة التليفون، وببص على صورة الورقة اللي وصلتني من رقم مجهول. كان مكتوب فيها إن جوزي محمود وبنت خالته نجلاء متفقين على إبعادي عن بيتي لمدة سبعة أيام، علشان ينفذوا خطة تخص الشقة اللي تعبت عمري كله علشان أشتريها.
لكن الصدمة مكنتش في الاتفاق نفسه. الصدمة كانت في اسم الشخص اللي ماضي كشاهد عليه. سامح… ابن عمي! الراجل اللي كنت بعتبره أخويا التاني بعد طارق. الراجل اللي أبويا الله يرحمه كان موصيه عليا قبل ما يمــ,,ـــــوت. الراجل اللي لما محمود اتزنق في فلوس من سنتين، وقف معاه وساعده. إزاي يكون شريك في خطة علشان ياخدوا بيتي من ورا ضهري؟! قعدت على طرف السر,,ـــــير، وحسيت إن الدنيا كلها بتلف بيا.
افتكرت آخر مرة سامح زارنا فيها. كانت من حوالي شهر. دخل البيت ومعاه علبة حلويات، وقعد مع محمود في البلكونة أكتر من ساعة. ولما سألتهم بيتكلموا في إيه، محمود ضحك وقال: — شغل يا هالة، إنتِ هتدخلي في شغل الرجالة كمان؟ وسامح ضحك معاه. وقتها اتضايقت من أسلوب محمود، لكن مخدتش بالي من حاجة. دلوقتي فهمت إن القعدة دي مكنتش بريئة زي ما كنت فاكرة. اتصلت بأخويا طارق. رد من أول رنة. — خير يا هالة؟
صوتك مالُه؟ قلت وأنا بالعافية بتكلم: — طارق… سامح ابن عمنا طلع معاهم! سكت لحظة. — معاهم في إيه؟ حكيتله عن الصورة اللي وصلتني. قال بسرعة: — ابعتيهالي. بعتها. فضلت مستنية رده، والدقايق كانت بتعدي كأنها ساعات. بعد شوية اتصل. — هالة، الورقة دي لازم نعرف مصدـ,,ـــرها، ومين كتبها، وهل هي أصلًا صحيحة ولا لأ. قلتله: — بس توقيع سامح واضح!
رد: — حتى لو شكله توقيعه، لازم نتأكد. متواجهيش حد دلوقتي، ومتتهميش حد من غير دليل. قلتله بوجع: — أنا مش مستحملة يا طارق… كل ما أفتكر إني عرفت الحقيقة، أكتشف إن فيه مصيبة أكبر! قال بحنان: — عارف يا حبيبتي، بس إنتِ لازم تكوني قوية. إحنا مش هندور على فضيحة، إحنا هندور على حقك. وبعدين سألني: — الرقم اللي بعتلك الصورة تعرفيه؟ قلت: — لأ. — طيب مترديش عليه دلوقتي، واحتفظي بالرسالة زي ما هي.
قفلت معاه، وفضلت أبص لصورة أبويا المعلقة على الحيطة. وقلت وأنا بعيط: — يا ريتك كنت موجود يا بابا… كنت هتعرف تحميني من الناس اللي إنت نفسك كنت فاكرهم سند ليا. بعد ساعتين، جرس الباب رن. بصيت من العين السحرية. لقيت سامح واقف! قلبي وقع في رجليا. فتحت الباب من غير ما أوسع له الطريق. — خير يا سامح؟ ابتسم وقال: — إيه يا بنت عمي؟! هو أنا بقيت غريب؟! قلت ببرود: — خير، محتاج حاجة؟
لاحظ إن وشي متغير. — مالك يا هالة؟! محمود كلمني وقالي إن بينكم مشاكل. بصيتله باستغراب. — محمود كلمك؟ — أيوه، وقالي إنك زعلانة منه علشان موضوع نجلاء. ضحكت بسخرية. — هو قالك كده بس؟ سامح اتلخبط. — يعني… فيه إيه تاني؟ قلت: — طب ما تدخل، أصل أنا كمان عندي كلام كتير عايزة أقولهولك. دخل وقعد في الصالون. عملتله كوباية شاي، وحطيتها قدامه. وبعدين فتحت صورة الورقة على التليفون وحطيته قدامه. — تعرف الورقة دي يا سامح؟
النقاش
التعليقات والردود (0)
سجّل الدخول للمشاركة في النقاش. تسجيل الدخول
لا توجد تعليقات بعد — كن أول من يشارك رأيه.